Basel am Rhein

Basel am Rhein

Z’Basel an mym Rhy,
Jo, dert mecht i sy!
Weiht nit d’Luft so mild und lau
Und der Himmel isch so blau
An mym liebe, an mym liebe Rhy .

Uf der Basler Pfalz
Alle Lyte gefallt’s.
O, wie wechsle Berg und Tal,
Land und Wasser iberal
Vor der Basler, vor der Basler Pfalz!

Wie ne freie Spatz,
Uffem Petersplatz
Flieg i um und ’s wird mer wohl
Wie im Buebekamisol +,
Uffem Peters-, Uffem Petersplatz.

Uf der breite Bruck
Fir si hi und z’ruck
Nai, was seht me Herre stoh,
Nai, was seht me Jumpfere goh,
Uf der Basler, uf der Basler Bruck!

Uf der griene Schantz
In der Sunne Glanz,
Won i Sinn und Auge ha,
Lacht’s mi nit so lieblig a,
Bis go Santi-, bis go Santi-Hans.

’s Seilers Redli springt;
Los, der Vogel singt,
Summervegeli jung und froh
Zieh’n de blaue Blume no,
Alles singt und, alles singt und springt.

Und e bravi Frau
wohnt der ussen au.
Gäb ech Gott e frohe Muet,
nähm ech Gott in treui Huet
liebi Basler, liebi Basler Frau.